ათასწლეულებ გამოვლილი ისტორიული მოვლენებისა და კულტურული პროცესების შედეგად ახმეტა დღეს, 21 საუკუნეში ერთ-ერთი ყველაზე ავთენტური და ეთნიკური მრავალფეროვნებით გამორჩეული რეგიონია. ახმეტის მუნიციპალიტეტი თავის ადმინისტრაციულ საზღვრებში აერთიანებს, როგორც კახეთის მხარისთვის დამახასიათებელ რელიეფსა და ფესვგამდგარ კულტურასა, ასევე თუშეთის თვითმყოფად არქიტექტურას, ადათწესებსა და მიუწვდომელ მწვერვალებს. მუნიციპალიტეტის საზღვრებში შედის კიდევ ერთი აღმოსაჩენი ძვირფასი ქვა – 34 კილომეტრზე გადაჭიმული ისტორიული ლეგენდა ხეობა – პანკისი. მე-19 საუკუნის 30-50 წლებიდან პანკისის ხეობაში მაისტელმა ქისტებმა დაიწყეს ჩამოსახლება, მათ მიერ ისტორიული სამშობლოდან წამოყოლილი ცხოვრების წესი შეესისხლხორცა ადგილობრივ კულტურას და შეიქმნა უნიკალური თემი, რომელიც ახმეტის მიწების განუყოფელი ნაწილი გახდა. დღეის მონაცემებით, ახმეტის მჭიდრო მიწებზე ძირძველ ადგილობრივ კახ მოსახლეობათან ერთად კომპაქტურად სახლობენ ოსები, ქისტები, ჩეჩნები, ასევე შიდა მიგრაციებით ჩამოსახლებული ფშავები და ხევსურები. რეგიონისთვის დამახასიათებელი კონტრასტები, იქნება ეს ეთნიკური მრავალფეროვნება, მთისა და ბარის განსხვავებული ცხოვრების სტილი, მეურნეობა თუ ტრადიცია, საუკუნეების მანძილზე აკუმულირდებოდა და იბადებოდა, ადამიანთა ხელით შექმნილი უნიკალური ცოცხალი კულტურა. უხსოვარი დროის გზავნილები – პიქტოგრამები, თუ კოშკ-მარანები, და მათ გარშემო აყვავებული მევენახეობა-მეღვინეობის ხელოვნება, ლურჯ მოჭიქული კრამიტით მობრჭყვიალე კვეტერას ეკლესია, ალაზანზე აღმართული უდიადესი ალავერდის მონასტერი, თუ თუშეთის ფერად ფარდაგებში ჩაქსოვილი სიცოცხლის აღქმა, სრულად ირეკლავს საქართველოს უწყვეტ ისტორიას.